ភ្នំពេញ៖ ឥឡូវនេះ អ្នកប្រើប្រាស់បណ្តាញសង្គមតេលេក្រាម (Telegram) អាចទទួលបាន 50% នៃប្រាក់ចំណូលពីការផ្សាយពាណិជ្ជកម្មដែលបង្ហាញនៅក្នុងឆាណែល (Channel) ខ្លួន ប៉ុន្តែតម្រូវឱ្យមានគ្រប់តាមគោលការណ៍ដែលតេឡេក្រាមកំណត់។

យោងតាមការផ្សាយរបស់ Telegram.org បានឱ្យដឹងថា ការរកចំណូលនេះ គឺពឹងផ្អែកទៅលើពាណិជ្ជកម្ម នៅពេលដែល Channel Telegram មានអ្នកតាមដានយ៉ាងតិច១ពាន់នាក់ឡើង នឹងអាចទទួលបាន 50% នៃប្រាក់ចំណូលពីការផ្សាយពាណិជ្ជកម្មដែលបង្ហាញក្នុងឆាណែលនោះ។

ប្រភពដដែលបានបញ្ជាក់ថា សម្រាប់ចំណូលដែលរកបាន Telegram នឹងធ្វើការទូទាត់ទៅម្ចាស់ Channel តាមរយៈ Toncoins ដែលជារូបិយប័ណ្ណគ្រីបតូដែលដំណើរការដោយ TON Blockchain ខណៈ ការទូទាត់តាម Toncoins គឺរហ័ស និងសេវាទូទាត់ទាបជាងសេវាធនាគារ។

គួរបញ្ជាក់ផងថា Telegram បង្ហាញពីការបើកឱ្យរកលុយ ប៉ុន្តែមិនទាន់បញ្ជាក់ពីមធ្យោបាយតភ្ជាប់ ដើម្បីអាចចូលទៅរកលុយបាននោះទេ Telegram។ Telegram នឹងធ្វើការបញ្ជាក់នៅពេលក្រោយបន្តទៀតចំពោះដំណើរការរកចំណូលនេះ៕